ഓഹരി വിപണിയില് വന്കുതിപ്പ് കാഴ്ചവയ്ക്കുകയാണ് എന്ബിഎഫ്സികള് ആയ മണപ്പുറവും മുത്തൂറ്റും. മണപ്പുറം ഫിനാന്സിന്റെ ഓഹരി 8 ശതമാനവും, മുത്തൂറ്റ് ഫിനാന്സിന്റ്റെ ഓഹരി 14 ശതമാനവും വരെ ഇന്ന് രാവിലെ വ്യാപാരത്തില് ഉയര്ന്നു.
നിലവിലിപ്പോള് മണപ്പുറം ഫിനാന്സ് ഓഹരിയൊന്നിന് 6.65 ശതമാനം ഉയര്ന്ന് 190 രൂപയിലും, മുത്തൂറ്റ് ഫിനാന്സിന് 4 ശതമാനത്തിലേറെ ഉയര്ന്ന്1392 രൂപയിലുമാണ് (11.23PM) വ്യാപാരം പുരോഗമിക്കുന്നത്. 2020 ജൂണിന് ശേഷം ഇന്ട്രാഡേ വ്യാപാരത്തില് വന്ന ഏറ്റവും കൂടുതല് നേട്ടമാണ് ഈ രണ്ടു ഓഹരികള്ക്കും ഇന്നുണ്ടായത്.
ഐ ഐ എഫ് എല് ഫിനാന്സില് ഉണ്ടായ പ്രശ്നങ്ങള് ആണ് ഈ രണ്ടു സ്ഥാപനങ്ങളുടെയും ഓഹരിവില വര്ധിക്കുന്നതിനുള്ള പ്രധാന കാരണം. ഐ ഐ എഫ് എല് ഫിനാന്സ് സ്വര്ണ വായ്പയില് വരുന്ന വീഴ്ചകള് റിസര്വ് ബാങ്ക് ചൂണ്ടിക്കാണിച്ചതിനെ തുടര്ന്ന് മണപ്പുറത്തിന്റെയും, മുത്തൂറ്റിന്റെയും ഓഹരികള് ഉയരുകയായിരുന്നു. ഓഹരി വിലക്ക് പുറമെ, വോളിയവും കുത്തനെ ഉയരുകയാണ്.
