അത്യാവശ്യത്തിനു ഒരു ലോണ്‍ നോക്കുന്നവര്‍ക്ക് ഇനി ഇഷുറന്‍സ് വഴി ലോണ്‍ നേടാം. സറണ്ടര്‍ വാല്യു ഉള്ള ഏത് ലൈഫ് ഇന്‍ഷുറന്‍സ് പോളിസി ഈടുവച്ചും വായ്പ എടുക്കാം. എല്ലാ ലൈഫ് ഇന്‍ഷുറന്‍സ് പോളിസികള്‍ക്കും വായ്പാ സൗകര്യം ലഭ്യമാക്കണമെന്ന് കമ്പനികളോട് ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്‌മെന്റ് അതോറിറ്റി ഓഫ് ഇന്ത്യ (ഐആര്‍ഡിഎഐ) ആവശ്യപ്പെട്ടിട്ടുണ്ട്. ഈ പദ്ധതി താമസം വിനാ നിലവില്‍ വരും.
ഇത് ഇ കെയര്‍ ന്‍ഷുറന്‍സ് പരിരക്ഷയ്ക്ക് ഒപ്പം സമ്പാദ്യവും ഉറപ്പുനല്‍കുന്ന പോളിസികള്‍ക്ക് (മണിബാക്ക്, എന്‍ഡോവ്‌മെന്റ്) മാത്രമാണ് പോളിസി ലോണ്‍ സൗകര്യമുള്ളത്. യുലിപ് (യൂണിറ്റ്-ലിങ്ക്ഡ് ഇന്‍ഷുറന്‍സ് പ്ലാന്‍), ടേം ഇന്‍ഷുറന്‍സ് എന്നിവ ഈടായി അംഗീകരിച്ചിരുന്നില്ല. ഇതില്‍ നിന്നൊരു മാറ്റാമെന്ന നിലയ്ക്കാണ് ഇനിമുതല്‍ സറണ്ടര്‍ വാല്യു ഗ്യാരന്റിയുള്ള യുലിപ് പോളിസികള്‍ക്കും വായ്പാ സൗകര്യമുണ്ടാകുന്നത്. മെച്യൂരിറ്റി കാലയളവ് പൂര്‍ത്തിയാകുന്നതിന് മുമ്പ് പോളിസി ഉടമ ഇന്‍ഷുറന്‍സ് പോളിസി വേണ്ടെന്നുവച്ചാല്‍ കമ്പനി തിരികെ നല്‍കേണ്ട തുകയാണ് സറണ്ടര്‍ വാല്യു. പോളിസി വായ്പയ്ക്ക് അപേക്ഷിക്കുമ്പോള്‍ സറണ്ടര്‍ വാല്യുവിന്റെ 85-90 ശതമാനം തുകയാണ് വായ്പയായി ലഭിക്കുക.
മേല്‍പ്പറഞ്ഞ രീതി അനുസരിച്ച് വായ്പയ്ക്ക് അപേക്ഷിക്കും മുമ്പ് പോളിസിക്ക് സറണ്ടര്‍ വാല്യു ഉണ്ടെന്ന് ഉറപ്പാക്കണം. എല്‍ഐസി, എസ്ബിഐ, എച്ച്ഡിഎഫ്‌സി ബാങ്ക് തുടങ്ങിയ പ്രമുഖ ബാങ്കുകളും ഇന്‍ഷുറന്‍സ് കമ്പനികളും പോളിസി വായ്പകള്‍ അനുവദിക്കുന്നുണ്ട്. ശരാശരി 10 ശതമാനം പലിശനിരക്കാണ് പോളിസി വായ്പകള്‍ക്കുള്ളത്.
